MISUMBONG sa inahan ang usa ka 10-anyos nga batang babaye human giingong gilugos sa ilang ka-boardmate alas 2:20 kagahapon sa kaadlawon, Biyernes, didto sa kanto Shrine Hills, McArthur Highway, Barangay Matina Crossing ning siyudad.

Ang suspek mao si Alfie (bansagon gitago), 25, ulitawo, kinsa nagpuyo tupad ra sa kuwarto nga giabangan sa inahan sa biktima.

Subay sa nakalap nga impormasyon sa Superbalita nasayran nga gibiyaan sa inahan ang iyang anak kay namalengke.

Paghawa sa inahan gihinay-hinay og kamang sa suspek ug giingong gilugos ang bata.

Niadtong orasa, wa miuli ang amahan sa bata gumikan gabii pa lang nagbikil na kini sa inahan sa bata maong wa siya sa ilang balay.

Pagbalik sa inahan naghilak ang bata ug misugilon kaniya sa gihimo sa suspek.

Daling midangop sa Women and Childrens Protection Desk (WCDP) sa Talomo Police Station ang inahan sa bata diin iyang giuban ang anak nga maoy misaysay sa nahitabo ngadto sa kapulisan.

Miresponde dayon ang mga pulis sa dapit ug nasikop ang suspek samtang natulog kini sa iyang kuwarto.

Gibalhog na ang suspek sa Talomo PNP samtang giandam na ang kasong ipasaka batok kaniya.