SI DEPARTMENT of Health (DOH)-Soccsksargen Regional Director Dr. Abdullah Dumama nagbutyag nga mikabat na sa 11 ang namatay ug laing 2016 ang na-ospital nga mga tawo sa dengue sa North Cotabato karong tuiga.
Sa pakighinabi sa Bombo Radyo, si Dr.Dumama nagsulti nga kini subay sa labing ulahing natala gikan sa bulan sa Enero hangtud karon.
Matud ni Dumama nga nagpabilin sa epidemic stage ang probinsiya tungod kay miusbaw ang gidaghanon sa mga gitakbiyan sa sakit.
Nasuta nga ang pag-ulbo sa sakit nga dengue sa Cotabato nahitabo sa lain-laing lugar.
Ang doktor mitambag nga ang labing mahinungdanon mao ang pagpanglimpyo sa palibot aron walay kapuy-an ang mga lamok ilabi na ang carrier sa virus nga moresulta sa sakit nga dengue.
Gani gi-doble na karon sa mga personahe sa Provincial Health Office ang ilang pagpanin kamot nga matabangan kadtong mga tawo nga apektado sa dengue. (Edgardo Fuerzas)