KAWANI sa Honda Megamotors Corporation ang suspek nga nakaligis sa 14 anyos nga batang lalaki kinsa kalit nitabok sa kalsada didto sa Km. 66, Barangay Sinaragan, lungsod sa Matanao, Davao del Sur, Sabado.

Ang menor giilang si Jade Saligan, ug lumolupyo sa lugar. Nadasmagan sa suspek nga nailhang si Paul Balagaso, 27, taga Barangay Poblacion, Matanao.

Nahitabo ang insidente mga alas 10:00 sa buntag niadtong adlawa.

Si Police Officer 2 Orlando Fuentes, traffic police officer, nga nitubag sa alarma, nagkanayon nga gimaneho ni Balagaso ang kolor itom nga Honda motorsiklo (plate number IX-8636) ug iya sa kumpaniya.

Kumpleto sa dokumento ang drayber sa motor apan wa gyud makalikay sa katulin pagtabok sa 14 anyos. Gikan sa siyudad sa Digos ang suspek ug pauli unta sa Barangay Poblacion apan nadisgrasya pag-abot sa lugar.

Nahiagom og daghang pangos ug bun-og ang biktima sa nagkadaiyang parte sa kalawasan apan swerteng naluwas sanglit giatiman gilayon sa Paulino Hospital didto sa dakbayan.

Di pa masuta sa kapulisan ang danyos sa motorsiklo apan giandam na ang kasong ipasaka batok sa suspek. (Dondon Dinoy)