DUHA ka mga lalaki ang pulos nahabwa ang tinae human giluba sa managlahing dapit ning siyudad sa Cagayan de Oro.

Unang biktima mao si Roland Salumayag, 20, lumad nga taga Kibuyag, lungsod sa Talakag, Bukidnon.

Giluba ang biktima sa Agora Road, Lapasan ning siyudad sa Cagayan de Oro niadtong Lunes mga alas 11:30 sa gabii.

Igo lamang nga nagtindog ang biktima sa daplin nga bahin kay adunay gihulat dihang giduolan sa usa ka wala mailang lalaki.

Sa pagtuo sa biktima nga adunay lamang kini pangutana ngadto kaniya igo na lamang kining gitan-aw apan nakurat si Salumayag dihang mikuha kini og kutsilyo dayon deretso nga giluba ang iyang tiyan.

Gilaslas pa sa suspetsado hinungdan nga nahabwa ang tinae sa biktima. Dali sab nga gidala sa mga nakasaksi sa Northern Mindanao Medical Center (NMMC) ang biktima apan kritikal ang kondisyon niini ning panahona.

Padayon pang giila sa kapolisan sa Police Station 3 sa Agora ang miluba sa biktima kinsa misibat human sa hitabo.

Laing biktima mao si Jonathan Ejem, 23, ulitawo, lumad nga taga Libona, Bukidnon.

Giluba ang biktima sa dalan Corrales Avenue niadtong Lunes mga alas 10:00 sa gabii.

Gikan pa sa iyang ayaan ang biktima ug hinay nga nagbaklay sa dapit dihang natabo sa tulo ka wala mailang lalaki.

Deretso nga giluba ang biktima sa tiyan hinungdan nga susama kang Salumayag nakita na usab ang tinae niini sa tiyan. Dali sab dayon nga misibat ang mga suspetsdo ug nangdagan.

Nakit-an ang biktima sa usa ka motorela driver ug maoy nidali pagdala niini sa NMMC aron matabang.