DIGOS CITY - Nailhan na sa Digos City Police Office (DCPO) ang duha ka mga lalaking gisalbids ug gilabay sa duha ka managlahing lugar sa dakbayan niadtong milabay nga semana.

Sa taho nga gipaguwa sa DCPO kagahapon, giila ang unang gisalbids nga mao si Norman Caballo, 40, ulitawo nga molupyo sa Society Village, Matina, Davao City.

Si Caballo nakaplagan nga gilabay didto sa Sityo San Nicolas, Barangay Tres de Mayo ning siyudad.

Samtang ang ikaduhang biktima nailhan nga si Eduardo Guillar III, 25, way trabaho ug nagpuyo sa Barangay Miranda, Babak, Island Garden of Samal (Igacos).

Dako ang panaghap sa kapulisan nga usa ra ang nagpaluyo sa pagpatay sa duruha sanglit pareho nga nakahiagum ug pito ka mga samad dinunggaban dihang nakaplagan.

Ang duruha nakitang gipang-baatan ug masking tape ang nawong ug gihiktan ang mga kamot ug tiil nga sama sa usa ka baboy.

Hinuon, di pa masuta sa DCPO kon nganong gipangsalbids ang duruha. (Orlando B. Dinoy)