PULOS nagikan sa siyudad sa Gingoog ang nilanding sa Northern Mindanao Medical Center (NMMC) ning siyudad sa Cagayan de Oro human giluba sa managlahing dapit didto ra usab sa ilang dapit niadtong Sabado.

Nahabwa ang tina-i sa unang biktima nga mao si Clemente Sotto, 48, residente sa susamang siyudad, human giluba sa kaugalingon nga bayaw niining giilang si Benito Escano, hingkod ang edad.

Gisaysay sa asawa sa biktima nga nagkalalis ang biktima ug suspek dihang nisangpot sa paglubaay.

Samaran usab ang suspek nga gidala sa balay tambalanan sa Gingoog. Apan mas grabe ang naangkon ni Sotto nga giduso sa NMMC ning siyudad.

Samtang laing biktima sa pagpangluba mao si Jerome Zembrano, 22, adunay kapuyo, taga Barangay 24, siyudad sa Gingoog.

Nasayran gikan na-inom ang biktima apan nabikil sa iyang kainom. Wala na gidahom sa biktima nga nasuko diay kaniya ang kauban sa iyang mga gipamulong tungod kay pagawas nila sa imnanan kalit lang siya nga gisukmag.

Wala makasukol ang biktima dihang nigamit na og hait nga hinagiban ang suspek ug deretsong giluba ang biktima nga miigo sa iyang likod, tiyan ug gusok nga bahin.

Kritikal ang kahimtang nga gidala sa NMMC ang biktima.

Ang kaso giatiman na sa kapolisan sa Gingoog Police Station. (SVB)