KAMATAYON ang gidangatan sa duha ka mga tawong sakay sa motorsiklo human sila gidaro sa usa ka Isuzu elf truck didto sa provincial road, Sta. Ana Avenue, sakop sa Barangay Tres de Mayo, dakbayan sa Digos.

Mga biktima sa aksidente giilang sila Freddie Labandero, 25, drayber ug ang angkas niini nga si Nestor Recella, 55, ug pulos molupyo sa Sitio Power sa lugar.

Subay sa imbestigasyon nga samtang sakay ang duha sa Honda XRM, may plakang LI-9081, nahitabo ang aksidente.

SAlas 6:00 sa gabii niadtong Martes, nagmaneho sa truck si Rafael Galacio, 52, taga Barangay Badiang sa siyudad, apan wala niini mabantayi ang gikasugat nga motor.

Ang imbestigador nga si SPO3 Felicisimo Putong Jr., nagkanayon nga diha-diha dayon namatay ang duha ka biktima tungod sa grabeng impak sa ilang pagbangga sa trak.

"The vehicle was running on the opposite direction and it is running without any precautionary measures when the incident occurred," ni Putong.

Mga biktima igo na lamang nga gihatud sa Perpetual Funeral Parlor samtang padayon nga nagsubay ang kapulisan aron maduso na ang kaso batok sa drayber. (Dondon Dinoy)