USA ka lalaki ang namatay human gipusil sa iyang kaugalingong manghod didto sa Purok 3, Barangay Linoan, lungsod sa Montevista, Comval Province.

Giila ang biktima nga mao si Romeo, 25, ug molupyo sa susamang dapit samtang ang suspek mao ang manghod sa biktima nga si Reynante Mayaki, 19.

Sumala sa report gikan sa Comval Police Provincial Office nga nahitabo ang pagpamusil pasado alas 11:00 sa gabii niadtong Martes.

Hubog ang biktima ug nagsige og panghagit og away didto sa ilang panimalay.

Tungod sa gihimo sa maguwang napungot ang suspek ug wa sab siyang kapugong hinungdan nga mikuha kini og airgun ug iyang napusilan ang maguwang.

Samad sa liog ang nahiaguman sa biktima hinungdan sa iyang hinanali nga kamatayon.

Ang suspek mitahan sab dayon kang Kapitan Romeo Quinones sa Barangay Linoan.

Gidala gilayon ngadto sa presinto sa kapulisan ang suspek samtang gihimo pa sa kapulisan ang imbestigasyon.

Kasong homicide ang giandam karon sa kapulisan batok sa suspetsado.(Marvin Pineda)