COTABATO City -- Traynta'y dos na ang namatay sa padayong giyera tali sa militar ug mga rebelde’ng Bangsamoro Islamic Freedom Movement (BIFM) ning probinsiya sa Maguindanao.

Sa maong gidaghanon, 27 niini ang mga sakop sa BIFM ug lima sa bahin sa kasundalohan sa 6th Infantry Division (6th ID).

Si Colonel Prudencio Asto, 6th ID Public Affairs Chief, mi-asoy nga ang mga namatay mao sila Sergeants Sonny Estabillo, Allan Miraflores, Privates First Class Henry Caunga, Arsenio Nunescan, ug Private Dunhil Aragon.

Samtang ang mga nasamdan mao sila si First Lieutenants John Dave Aguilar, Dimaluan, Corporals Rommel Mantos, Luis, Private Mar Batanas, ug Privates First Class Capilitan, Idul, Payoyo ug Primeva.

Sa kasamtangan, padayon nga mitaas ang ihap sa mga pamilya nga mihikling gikan sa mga apektado’ng dapit sa Maguindanao.

Samtang gikanayon ni Maguindanao Governor Esmael Mangudadatu nga dunay sagol politika ang nahitabong kagubot karon sa Maguindanao nga binuhatan sa mga "spoillers" o supak sa pagpirma sa final peace agreement tali sa gobyerno ug Moro Islamic Liberation Front. (Edgardo Fuerzas)