USA ka 34 anyos nga lalaki ang gipusil sa iyang pag-umangkon niadtong Martes mga alas 6:30 sa hapon sa Brgy. Taas lungsod sa Salay, Misamis Oriental.

Giila ang biktima nga mao si Russel Magan, 34, minyo, sa susamang dapit.

Gitumbok nga suspetsado ang pag-umangkon sa iyang asawa nga mao si Jojong Abing, hingkod ang edad, silingan sa biktima.

Nilanding sa Northern Mindanao Medical Center (NMMC) ning siyudad sa Cagayan de Oro ang biktima human sa pagpangluthang.

Usa ka NMMC personnel nga nahinabi sa Sun.Star Superbalita nibutyag nga una nang nagkabikil ang duha dihang anaa pa gawas sa puloy-anan si Magan.

Nisulod na lamang kini sa panimalay niini aron dili na magdako ug mosangpot sa dautan ang giawayang nga wala gikabutyag.

Apan atol sa panihapon sa pamilya Magan, kalit lang nga misulod sa puloy-anan si Abing ug gitawag si Magan.

Sa pag-atubang sa biktima deretso niining gipusil si Magan hinungdan sa pagkaigo sa tiyan ug sa tiil nga bahin.

Wala matinong kalibre ang gigamit sa suspetsado human daling milakaw pagtan-aw nga nagbuy-od sa salog si Magan.

Ang hingtungdan sa biktima ang daling midala niini sa NMMC human sa hitabo.

Miresponde sab ang kapolisan sa Salay Police Station apan wala masikop ang suspetsdo human daw misibat.

Sa pagsulat ning balita nagpabilin pa sa balay tambalanan ang biktima nga luwas na sa makuyawng kahimtang.