USA ka lalaki gipusil patay sa wa mailhing mga suspetsadong lulan sa motorsiklo didto sa lungsod sa Pantukan, Compostela Valley (ComVal) Province, Lunes sa buntag.

Giila ang biktima nga mao si Juliuos Sumargao, 39, ug molupyo sa Barangay Kingking, lungsod sa Pantukan.

Sa report gikan sa Comval Province Police Provincial Office nasayran nga pasado alas 10:15 sa buntag, nagpatubil sa iyang gidraybang Isuzu Fuego nga sakyanan ang biktima sa usa ka gasolinahan sa Pantukan dihang nahitabo ang krimen.

Ang biktima kalit nga giduol sa duha ka wala mailhing suspek nga nagsakay og Skygo nga motor ug gipusil gamit ang wa pa matinong kalibre sa armas.

Samad pinusilan sa ulo nga bahin sa iyang lawas ang nahiaguman sa biktima hinungdan sa iyang hinanali nga kamatayon.

Human masigurong patay na ang biktima, mga suspek dayong misibat padulong sa direksyon sa Davao Oriental.

Kapulisan sa lungsod sa Pantukan miresponde apan wa na nila maabti ang mga suspek. Dugang imbestigasyon ang gilusad sa mga otoridad. (Marvin Pineda)