KIDAPAWAN CITY - Upat ka mga sakop sa Citizen Armed Forces Geographical Unit (Cafgu) ang naangol human gipabuthan og granada ang ilang kampo alas 12:30 sa kaadlawon kagahapon.

Mga samaran naila nga sila si Arman Singson, Erickson Prenal, Jigg Oracoy, Crisito Neri og iyang asawa nga si Amelia.

Si Colonel Prudencio Asto, hepe sa 6th Infantry Division Public Affairs sa Philippine Army, nagkanayon nga duha ka wala mailhing lalaki kinsa sakay og motorsiklo nga way plaka miitsa og granada sa Cafgu detactment didto sa Barangay Batulawan, Pikit hinungdan sa pagkasamad sa mga nahisgutan.

Dugang ni Asto nga dali nga misibat ang mga suspetsado paingon sa Barangay Kalakitan og wala na maabti sa paggukod sa uban pang mga sakop sa Cafgu.

Mga nasamdan daling gidala sa Cruzado Hospital sa Barangay Poblacion kon diin pabilin pang giatiman sa mga doktor.

Nagtuo si Pikit Mayor Sumulong Sultan nga ang pagpanglabay og granada dunay kalambigitan sa nahitabong kabugot karon didto sa Maguindanao.

Hinuon ang kapulisan ug militar nag-alayon na aron nga imbestigahan ang among hitabo ug sayron ang mga responsable. (Edgardo Fuerzas(