USA ka langyaw ang midangop sa kapulisan aron ireklamo ang iyang hinigugma nga giingong misibat sa iyang kuwarta ug mahalong butang alas 4:00 sa kaadlawon, Lunes.

Mireklamo mao si Richard Strong, hamtong, lumad nga taga Estados Unidos ug kasamtangang nagpuyo sa Boulevard, ning siyudad.

Gisaysay sa blotter sa San Pedro Police Station nga mipatala ang langyaw gumikan gisibat sa iyang hinigugma ang iyang Toshiba Laptop nga mokantidad og P50-mil ug P10-mil nga cash sa iyang pitaka.

Una niini, midangop ang iyang hinigugma nga gitago sa pangalang Coring, 25, gumikan nasakpan niini ang langyaw nga giingong dunay kaubang laing babaye sud sa ilang kuwarto.

Nadesisyunan na lamang sa iyang hinigugma nga maoy mobiya sa ilang giabangan nga lawak sa Boulevard.

Giingon sa langyaw nga gidala ni Coring ang iyang gamit ug kuwarta.

Sukad sa pagkalap niining balita, wa pa masayri kung diin padulong ang iyang hinigugma. (Jeepy P. Compio)