USA ka Philippine Army major mihimakak sa kalambigitan sa upat ka US servicemen sa usa ka rambol sa bar dinhi sa siyudad sa Davao, Dominggo.

Si Major Jake Obligado sa Civil Military Operations Battalion sa 10th Infantry Division nagkanayon nga may koordinasyon sila sa miduaw nga mga Amerikanong sundalo dinhi sa dakbayan, ug walay usa kanila nga nalambigit sa rambol sud sa bar.

Giangkon ni Obligado nga pipila ka US servicemen nga mianhi sa siyudad sa nakalabay nga semana aron maglulinghayaw ug maglingaw-lingaw.

Suma niya ang mga sundalong Amerikano misalmot sa joint activity tali Armed Forces of the Philippines sa Cotabato.

Wa na hinuon siya mihatag og dugang detalye.

Pung ni Obligado nga Sabado sa gabii, uban ang pipila ka higala sa Eagles Bar sa Marco Polo Hotel may nakita silang upat ka Caucasians nga hubog na ug langas kaayo. Suma niya, dili mga US servicemen ang upat.

Dugang niya nga posibleng kini ang samang langyaw nga nalambigit sa rambol sa Barrio Obrero, Dominggo sa buntag.

Nahitabo ang kagubot sa bar human ang upat ka langyaw nga gituohang US servicemen, mibugal-bugal (bully) sa usa ug mi-dirty finger pa.

Mga 20 ka tawo sa palibot ang mitabang og bukbok sa upat ka langyaw.

Usa sa gikatahong miapil og bukbok sa langyaw ang usa ka lokal nga opisyal.

Ang insidente wa hinuon matala sa Davao City Police Office.

Apan si Davao City Vice Mayor Paolo Duterte mikumpirma sa insidente ug nagsulti nga siya gipahibawo sa usa ka higala nga nakasaksi sa hitabo.

Si Duterte midumili na hinuon paghatag og dugang detalye sa hitabo.

Dugang ni Major Obligado nga buot lamang niyang klaruhon ang isyu tungod ang opisyal sa US mitawag kaniya aron klaruhon ang report. (Ben O. Tesiorna)