MIDUOL sa Police Station 1 sa Divisoria ang usa ka biktima human gilabni ang dala niining handbag mga alas 11:30 sa buntag niadtong nilabayng adlaw.

Ang biktima nga si Minda Salinas, 59, balo ug lumulupyo sa 2112, Barangay Nazareth, ning siyudad, igo na lamang mitaho sa kapolisan human sa hitabo.

Gisaysay sa biktima nga samtang nagbaklay kini sa dalan Chavez sa Barangay 5 ning siyudad padulong sa usa ka money changer kalit nga may milabni sa iyang bag nga adunay sulod P25,000, PNB US passbook, mga porma sa SSS retirement ug sa LTO para sa driver’s license, PNB ATM Card ug cellphone nga mokantidad sa P3 mil.

Giasoy sa biktima nga ang wala mailhing suspetsado nakamotorsiklo ug misibat paingon sa wala matinong direksiyon.

Dugang pa niini nga ang suspetsado naka short pants, naka itom ug T-shirt, scarf, naka tsinelas ug wala kini mag sul-ob ug helmet.