WA pa mailhi sa kapulisan sa dakbayan sa Talisay ang lawas sa usa ka lalake nga naputos sa samad pinusilan ug gituohang gi-salvage ug gilabay niadtong Biyernes sa gabii sa Barangay Biasong.

Ang biktima gibana-banang nagpangidaron og 34-38 anyos, kasarangan ang panglawas 5’3” ngadto sa 5’4” ang gitas-on, nagsul-ob og karsones ug blue t-shirt.

SPO1 Mikie Espina, imbestigador sa Talisay City Police, nagkanayon nga ang mga residenti sa lugar nakabati lang og usa ka buto sa armas de fuego.

Nanawag kini sa mga pulis ug napalgan sa kapulisan ang biktima nga nagbuy-od sa dapit.

Si Espina niingon nga sila na lang ang nidala sa biktima ngadto sa Talisay City District Hospita apan gideklarar kining patay na.

Ang kapulisan nakarekuber sa crime sa usa ka .357 magnum revolver uban sa upat ka mga bala nga diha sa posisyon sa biktima.

Matod ni Espina nga wa nila isalikway ang posibilidad nga ang biktima gipusil sa makadaghang mga higayon sa laing lugar ug diha lang gilabay sa Barangay Biasong.

Sa pagkakaron, nagpadayon ang ilang imbestigasyon sa kaso ug ilang gitinguha ang pag-ila sa biktima aron masubay ang background niini.

Di kini unang higayon nga dunay gi-salvage sa mao nga dakbayan.

Sa hinapos sa miaging buwan, usa ka tawo ang napalgang patay duol sa baybayon nga ginapos.

Ang biktima gituohan nga gi-salvage sa wa pa mailhing mamumuno.