"I'M NOT a womanizer."

Kini ang pahayag ni Police Chief Superintendent Alexander Ignacio dihang miabot sa Ninoy Aquino International Airport (NAIA) Terminal 3, Biyernes sa hapon.

Si Ignacio sakay sa Singapore Airlines flight SQ 912, miabot gikan Malaysia mga alas 3:30 p.m.

Siya ang nagrepresenta sa Philippine National Police (PNP) sa ASEAN Police Conference.

Si Ignacio mihangyo nga dili na lamang ipublikar ang iyang hulagway aron malikayan nga siya masawayan sa mga netizens.

"My family, including my ailing mother, is badly affected by this scandal, and so I request for private moments with my family while the lawyers are preparing the documents for the formal filing of charges against the model Alyzza Agustin," suma sa opisyal.

Subli sab nga gilimod sa opisyal nga may personal niyang kaila ang modelo.

Kahinumduman nga gisumsuman og taman sa social media ang post ni Agustin nga nagpakitang naka-ipsot siya sa traffic violation nga gikalambigitan tungod sa calling card sa opisyal nga may special message.

Dugang sa opisyal nga dili niya executive assistant ug dili sab connected sa ilang buhatan ang modelo.

Niya pa, ang business card nga gamit sa modelo dili official card nga nagrepresenta sa iyang buhatan.

Pahayag ni Ignacio nga kasuhan gyud niya si Agustin sa kadaut nga gihatag kaniya ug sa iyang pamilya.

Sa nakalabay nga adlaw nag-sorry ang maong modelo sa iyang gihimo.