GIPASPASAN na sa kagamhanang probinsiyal ang paghuman sa pinakadako ug modernong Sports Cultural and Business Center Complex nga nahimutang atbang sa Davao del Sur Provincial Capitol.

Si Davao del Sur Governor Douglas Cagas naglaum nga mahuman na gyud sa Nobyembre 28 ang iyang proyekto sanglit gitakda na sa Disyembre 4 ang pag-abri niini.

Sumala pa nga dinhi sa lalawigan himuon ang Philippine Basketball Association (PBA) Games ug sa mismong sports complex masaksihan ang mga duwa.

Didto sa nasud Amerika, magagikan ang mga modernong gamit sud sa gym sama sa shot clock, fiber glass board ug flooring.

Adunay unom ka mga comfort rooms sa tulo ka floor ug unom ka shower set matag andana. Masulod sab ang 5 mil ka mga tawo panahon nga adunay dagkong okasyon.

Gawas sa sports, mamahimong magamit ang gymnasium sa mga dagkong konbensiyon gumikan kay fully-airconditioned kini.

Ipadayon sab pag-trabaho ang rubberized field oval, duha ka olympic size swimming pool ug duha ka outdoor basketball court, lawn tennis ug volleyball court.

Sa sulod sa compound, tukuran og dormitory alang sa mga atleta. Ang proyekto gigastusan og P500 million nga giutang gikan sa World Bank.

Hinuon, gipasiatab ni Cagas nga mauli ra ang nagasto sa probinsiya sa ngadto-ngadto kon pormal na nga magamit ang modernong pasilidad. (Orlando B. Dinoy)