IPATUMAN sa Cebu City Government ang hingpit nga pagsira sa 15 ka ektaryang tambakanan og basura sa barangay Inayawan sugod Enero 15 sunod tuig.
Kini ang gibutyag ni Mayor Michael Rama aron makasugod na og trabaho ang City Hall sa pagpalambo sa Inawayan landfill nga karon naglaundok na ang basura.
Mayoriya sa basura nga makolekta sa Siyudad adto na ilabay sa landfill sa Consolacion.
Si Atty. Jade Ponce, chairman sa Solid Waste Management Board (SWMB), nagkanayon nga nahukman ni Rama ug sa SWMB nga ipahamtang na ang zero waste dumping sa Inayawan aron di na magsalig ang mga tawo.
Gihimong sanglitanan ni Ponce mao ang pagpatak-op sa mayor sa Inayawan niadtong 2011, diin bahinon ang malata sa dili malata ug di na ilabay sa Inayawan apan ang uban magsige gihapon og hangyo gumikan sa kalayo sa Consolacion.