Editoryal: Kawa sa pulitika mibukal
MIBUKAL na pag-ayo karon ang kawa sa pulitika sa pagsud kagahapon sa campaign period sa mga kandidato alang sa nasudnong posisyon.
Subsob na ang pagpaila sa mga kandidato ug pagpresentar sa plata-porma sa ilang kandidatura. Nagkainit karon ang paglinabayay og lapok o mga negatibong isyu batok sa magkaatbang nga kampo sa pulitika.
Samtang, base sa mga survey, ang higpit nga kompetisyon dayag nga tali sa tandem nga Manny Villar-Loren Legarda sa Nacionalista Party (NP) ug Noynoy Aquino-Mar Roxas sa Liberal Party (LP) sa pagka presidente ug bise presidente sa nasod.
Sa di madugay, ang mosamot sa pag-awas ug moigting ang kawa sa pulitika sa pagsugod sa kampanya sa mga lokal nga posisyon.
Ang haring-lungsod masentro na sab sa pagtagad ug pagpangamuyo sa pagkuha sa ilang balaang boto.
Apan, atong hinumdoman kanunay nga ang tanang gisulti sa mga kanditato sa pagbaligya sa ilang kaugalingon posibling taphaw lang samtang, ang ilang gipanglabay nga lapok batok sa mga kaatbang di usab tanan dunay kamatuoran.
Busa igmat kita mga yanong lungsuranon sa pag-ila sa mga kandidato - hashasan nato pag-ayo ang mosunod nga han-ay sa mga opisyal nga moduma sa nasod ngadto sa tino nga kalamboan sa mosunod nga dekada.
Ug ang panahon sa kampanya kritikal nga bahin diha sa pag-umol sa atong malantip nga pagpakanaog hukom sa adlaw sa botasyon ug manghinaot kita nga mopatigbabaw ang malinawong proseso sa eleksyon.