GIPABUHAGAY ni Kawhi Leonard nga daw damgo lang ang tanan dihang nakapanag-iya na siya og championship ring sa National Basketball Association (NBA) nga gibuwakan pa og Finals MVP trophy.
Human gianunsyo ni NBA Commissioner Adam Silver si Leonard isip MVP, gidumog ang 22 anyos nga basketbolista sa iyang mga kauban samtang nagsadya og maayo si coach Gregg Popovich.
“Right now, it’s just surreal to me,” asoy ni Leonard. “I have a great group of guys behind me.”
Si Leonard nimugna og 22 puntos ug 10 rebounds aron pangulohan ang kadaugan sa Spurs kagahapon sa Game batok sa Miami Heat nga naghuman sa 2014 finals series, 4-1.
Na-fouled out si Leonard sa 4th quarter apan mura na lang kini og wala gumikan kay kontrolado na sa Spurs ang duwa.
Gawas sa iyang opensa, mikuha sab og atensyon ang depensa ni Leonard ngadto sa hari sa Heat nga si LeBron James sa kinatibuk-an sa series.
Pagkahuman sa Game 5, gipangulohan ni James ang usa ka grupo sa Heat aron mopahalipay sa Spurs. Ang labing unang gipahalipayan ni James mao si Leonard.
Si James maoy tag-iya sa Finals MVP title sa miaging duha ka mga tuig diin naghari ang Heat apan ning higayuna, angayan lang kining maangkon ni Leonard.
Alang sa Spurs, si Leonard maoy mosunod nila ni Tim Duncan, Manu Ginobili ug Tony Parker isip nailang lider sa ilang puwersa.
“The first two games, he didn’t play so well,” asoy ni James kabahin kang Leonard. “I thought he attacked more in the last three games, shot the ball extremely well.”
Bisan bugnaw ang iyang duwa sa nag-unang duha ka mga kombati, si Leonard nakaposte gihapon og 17.8 puntos sa series sa 61 percent shooting.
Si Leonard maoy labing batan-on nga nakadaog og Finals MVP title gikan niadtong 1999 diin si Duncan nakalabni niini sa samang edad ni Leonard. (Reuters/ESL)