GIKANTIYAWAN nila Top Rank Promoter Bob Arum ug coach Freddie Roach ang undefeated boxer nga si Floyd Mayweather Jr.

Ang duha nagtuo nga modili gyud si Mayweather kung hangyuon ang rematch kontra Cotto.

Suma ni Arum, sa pares nila Cotto-Roach wa gyuy ikabuga si Floyd.

Kahinumduman nga niadtong 2012, midaug si Mayweather via unanimous decision niadtong dili pa si Roach ang naghupot ni Cotto.

Alang ni Arum, kung si Mayweather nakalikay kang Manny Pacquiao mas grabe na karon human ang impresibong performance ni Cotto kontra Sergio Martinez.

Pahayag ni Roach, posibleng mangita na sab og “alibi” si Mayweather nga di makaharong si Cotto.

Nauna nang gidayeg sa Hall-of-Fame trainer nga si Roach si Cotto human niini, giayo-ayo og bukbok si Martinez sa ilang bugno, Sabado, nailog niya ang WBC middleweight championship belt.

Gikuha ni Cotto si Roach isip trainer niya niadtong Hulyo 2013, diin nagmalampuson ang ilang panag-uban.

"We had a great game plan, and he followed it to a T. He’s maybe one of the best students I've ever had," ni Roach.