GIANGKON sa Police Regional Office (PRO-7) nga aduna silay na-rescue nga biktima sa pagpanagit sa Bago City, Negros Occidental.

Ang biktima didto gidagit sa Negros Occidental, apan diha na nila maluwas sa may Toledo City.

"The Manny Pacquiao Blog". Click here for stories and updates on the Filipino boxing champ.

Si Jordan Chua, 26, adunahan nga negusyante, gidagit sa upat ka armadong mga tawo ug gipusil ang iyang kauban nga si Joel Arroyo, 41, sa dughan.

Ang duha nagbiseklita sayo sa buntag sa Brgy. Dulao, Bago City niadtong usang Biyernes, Marso 5.

Usa sa mga anggulo sa pagpanagit nga gisubay mao ang negusyo.

Ang pamilyang Chua nag-operate og panagatan sa Mindanao.

Si Senior Supt. Melvin Ramon Buenafe, pangulo sa Regional Intelligence Division (RID-7) niingon nga nakadawat silag report nga ang biktima diri gidala sa Sugbo sa iyang mga kidnappers.

Matod ni Buenafe nga niadtong Miyerkules, Marso 10, pasado alas 2 sa hapon, ang biktima ilang na-rescue sa pantalan sa Toledo City nga gibiyaan na sa iyang mga kidnapper.

Nagkanayon si Buenafe nga posebling nakabantay ang mga gikatahapan sa ilang presensya hinungdan nga dali siyang nibiya.

Hinuon wa mokompirmar ug wa usab mohimakak si Buenafe kon nakahatag bag ransom money ang pamilya sa biktima.

Si Buenafe niingon nga ang importante nga ilang naluwas ang biktima ug atoa na kini karon sa kiliran sa iyang pamilya.

Matod niya nga padayon pa karon ang ilang imbestigasyon.

Apan siya niangkon nga ila nang nailhan ang mga gikatahapan. Wa usab nila isalikway ang posebilidad nga ania pa sa Sugbo ang mga kidnappers ug aduna kiniy contact dinhi sa Sugbo.