USA ka tawo gipatay sa iyang bayaw tungod karaang bikil.

Wa na madala sa ospital ang biktimang si Julius Torcal, 35, minyo ug laborer didto sa Sitio Biao Panda, Barangay Patulang, lungsod sa Jose Abad Santos, Davao del Sur.

Giayo pagtigbas sa suspek nga nailhang si Arnold Salapsapan, ang lawas sa iyang bayaw mga alas 6 sa sayong kabuntagon sa miaging adlaw.

Nahiagum sa ngilngig nga kamatayon ang bayaw sa suspek human maka-angkon og daghang mga samad sa nagkadaiyang parte sa kalawasan nga miresulta sa iyang kamatayon.

Human nalup-og ang biktima sa yuta, gibiyaan ra siya sa suspek.

Si Salapsan mitahan sab ngadto ni Barangay Kagawad Josue Maon sa silingang Barangay Nuing, duha ka oras human gibuhat ang krimen.

Human gipahibawo ang kapulisan dali nila nga gikuha ang suspek ug gisugdan dayon ang imbestigasyon.

Sumala pa nga dugay na nga may bikil ang duha.

Ang suspek nagtingkagol na sab karon sa prisuhan.

Pung ni Police Officer 3 Nestor Branzuela, imbestigador sa kaso, nga gihan-ay na sab nila ang kasong ipasaka batok sa suspetsado. (Dondon Dinoy)