KRITIKAL ang kahimtang sa usa ka lalaki human giunay og luba sa igsuon niini niadtong Martes mga las 3:00 sa hapon sa Poblacion, siyudad sa Gingoog.

Nilanding sa Northern Mindanao Medical Center (NMMC) ning siyudad sa Cagayan de Oro ang biktima nga mao si Enerio Baranggan, 50, minyo, sa susamang dapit.

Ang asawa niining si Genelita nisaysay sa hitabo niingon nga nagpa-harvest sila og humay sa igsuon niining si Virgilio Baranggan, hingkod ang edad, dihang pagkahuman ug harvest niini, nangayo kini og taas nga pangayo hinungdan nihangyo ang biktima nga ubsan kini, apan nidumili gyod si Virgilio labina gikinahanglan usab niini pag-ayo ang kwarta.

Tungod kay wala man nagkasinabot ang magsuon, misangpot sa panaglalais ug miresulta sa pagpangluba.

Kalit lang nga mikuha ug kutsilyo si Virgilio ug deretsong giluba ang biktima sa kilid nga bahin ug gilaslas ang tiyan niini hinungdan nahabwa ang tina-i.

Gidala sa duol nga balay tambalanan sa dapit ang biktima, apan giduso sa NMMC ning siyudad tungod sa grabeng naangkon. Gikatakdang operahan ang biktima, apan sa pagsulat ning balita, kasamtangan pa giobserbahan sulod sa emergency room.

Ang igsuon niini giingong nasikop na sa kapolisan sa Gingoong Police Station ug kasamtangan nga gibalhog. (Stephanie V. Berganio)