USA ka lalaki ang wa na kaabot og tuig 2010 human gidunggab patay sa iyang kabikil didto sa Barangay Tanglaw, lungsod sa Braulio E. Dujali Davao del Norte, Huwebes sa gabii.

Giila ang biktima nga si Ronaldo Rayos, 30, molupyo sa Purok 3, Barangay Tanglaw.

Samtang ang suspek mao si Josie Ronie Pagayon, 39, molupyo sa susamang dapit.

Sa report gikan Dujali Municipal Police Station nasayran nga nahitabo ang pagpanunggab pasado alas 10:40 sa gabii.

Naglingaw-lingaw matud pa ang biktima ug ang suspek sa balay ni Councilor Ruel Onez didto sa may Townsite susamang dapit.

Kalit lamang nga gisumbag ni Rayos si Pagayon hinungdan nga milukapa kini.

Sa pag-uli sa biktimang si Rayos sa iyang balay, gisundan diay siya sa suspek, way paglangan gidunggab siya gamit ang usa ka kutsilyo.

Nakahiagum og samad dinunggaban sa kalawasan ang biktima nga miresulta sa iyang kamatayon.

Samtang ang suspek malampuson nga nasikop sa mga otoridad.

Ang suspek nga si Pagayon gitanggong na karon sulod sa selda samtang gihikay na ang kasong ipahamtang batok kaniya.

Sumala pa ni Kapitan Restie Tabirao sa Barangay Tanglaw nga personal nga bikil ang nakitang motibo sa nahisgutang hitabo. (Marvin Pineda)