HUMAN sa mas lawom nga medical analysis, ang mga doktor sa New Jersey hospital nakadesisyon nga dili na mopadayon sa pag-opera sa thymus glands ni kanhi PBA superstar Abet Guidaben.

Nagkanayon si PBA Legends USA Foundation secretary general Ruffy Ignacio nga giresitahan na lang sa mga doktor si Guidaben og mga tambal unya padayon sab nilang obsrebahan ang kondisyon niini.

Updates on President Benigno Aquino III's presidency

Wala pa masayri kon tugtan ba si Guidaben nga makauli sa ilang balay kay kon atakihon kini, maglisod gyud kini’g ginhawa unya dili sab kini makakaon.

Ang laing kanhi PBA superstar nga si Abe King, kinsa maoy pangulo sa PBA Legends USA Foundation, nagkanayon nga mopahigayon sila og charity game sa Carson, California karong Septiyembre 11 aron makakuha og pundo nga itabang sa gastuhan ni Guidaben.

Ang PBA board nga gipangulohan ni chairman Rene Pardo nakatakdang maghugpong karong Agusto 10 aron tukion ang kabahin sa ilang ihinabang sa kanhi two-time MVP ug sinaligan sa Crispa Redmanizers.

Ang San Miguel Corporation nihatag na’g donasyon nga $5,000 alang kang Guidaben.