GISIKPAW sa kapulisan sa Digos City Police Office ang usa ka gwardiya human gireklamo nga nangilkil sa usa ka 19 anyos nga babaye.

Si Merlita Gaso, lumolupyo sa Lim Extention, siyudad sa Digos ug kanhi empleyado sa Merna Drug Store and Minimart didto sa lungsod sa Matanao, Davao del Sur, nangayo og tabang sa kapulisan human gisulayan og kilkil sa suspek.

Sumala pa nga banda alas 11 sa buntag niadtong Biyernes, gisikop sa kapulisan ang suspek nga mao si Sundy Ramirez, 27, ulitawo ug nagpuyo sa lungsod sa Bansalan, Davao del Sur.

Subay sa reklamo ni Gaso, gihulagway niya nga ang suspek nga nagpunay og pagpanghadlok nga iyang ibutyag ang iyang sekreto ug patyon siya kon dili mohatag og kuwarta.

Gibutyag ni Gaso nga mihatag na siya og P10 mil ngadto kang Ramirez niadtong Marso 14 tuig kasamtangan.

Apan sayo sa buntag niadtong Biyernes, nakadawat na usab siya og text message gikan sa suspek ug nangayo og laing P7 mil ug mibahad nga kon di siya mohatag, adunay mahitabo kaniya ug sa iyang pamilya.

Human mireklamo ang biktima, mga sakop sa Digos City Police Office mihimo gilayon og operasyon gamit ang marked money nga kantidad og P2 mil aron nga dakpon ang suspek.

Si Ramirez nadakpan atol sa iyang pagdawat sa kuwartang minarkahan gikan kang Gaso didto sa Digos City Satellite Terminal alas 3:30 ang takna sa hapon.

Nakuha gikan sa posisyon sa suspek ang marked money, Nokia cellphone ug pitaka niini nga dunay identification card ug uban pang dokumento.

Sumala ni SPO4 Esdraz delos Santos, imbestigador sa DCPO, nga ila dayong gipasakaan og kaso ang suspek.