USA ka hubog kinsa gituohan nga mitabok sa Davao River ang napalgan nga wa nay kinabuhi didto sa Barangay Mandug niadtong Sabado.

Napalgan sa alas 8:50 sa gabii mao si Rogelito Bacus, 28, ulitawo, Quarry Conssession Checker ug nagpuyo sa Sitio Bonggan, Barangay Talandang, disrtrito sa Tugbok, siyudad sa Davao.

Si SPO1 Samuel Gilay sa Buhangin Police Station nagbutyag sa iyang spot report nga hapit na madugta ang patay'ng lawas sa biktima dihang ilang giugkat didto sa Barangay Mandug.

Matud ni Gilay nga base sa rekord Mandug Community Police Action Center, ang biktima gikataho nga nahanaw sa alas 11:00 sa buntag niadtong Oktubre 29.

Base sa gihimong makuting imbestigasyon sa kapulisan, ang biktima katapusan nga nakita sa alas 11:00 sa gabii niadtong Oktubre 28 didto sa Sitio Fatima, Barangay Mandug.

Giingon nga hilabihang huboga sa biktima niadtong gabhiuna kinsa nagpahibalo nga mopauli na sa ilang pinuy-anan sa Barangay Talandang.

Gituohan nga nag-inusarang mitabok ang biktima sa Davao River ug tungod sa kahubog natumba sa sapa hangtud nga nalumos ug namatay.

Ang biktima atua karon gihaya sa Angel Funeral Homes samtang gihikay sa iyang kabanay ang paghatud kaniya sa katapusan niyang pahulayan. (AD)