MALITA, Davao del Sur -- Gipasaka na sa Malita Police Station ang kasong parricide batok sa inahan nga miunay pagpatay sa dos-anyos niyang kambal nga anak.

Gikasohan mao si Kessel Marie Titong human giluba og kutsilyo ang iyang mga anak nga sila si Clarissa Loouse ug Clancy sud sa ilang balay alas site sa buntag niadtong Septyembre 23 didto sa Sitio Kulo, Barangay Poblacion sa lungsod.

Mga biktima nakabsan sa kinabuhi human mahiagum og daghang mga samad dinunggaban sa nagkadaiyang bahin sa lawas.

Naglibog sab ang Women and Child Protection Desk kon unsay motibo sa inahan nganong nabuhat ang krimen.

Wala na nakit-an ang inahan human milayas kini human sa panghitabo.

Kahinumdoman nga narekober sa mga kapulisan sa nahitaboan ang nagkadugo nga slicer knife nga gituohang maoy gigamit sa inahan sa pagkutlo sa kinabuhi sa iyang kambal. (Orlando B. Dinoy)