NAGMALAMPUSON na sab ang mga wa mailhing karnaper sa pagdagit og usa ka motorsiklo nga gipanag-iyahan sa Top Agro Products, niadtong Lunes.

Nagminghoy ang nagdala sa motor nga si Daryl Burato, molupyo sa Purok 5-A, Barangay Sinayawan, lungsod sa Hagonoy, Davao del Sur, dihang iyang nadiskubrehan nga nahanaw na ang motor nga giparada sud sa iyang panimalay.

Biktima, kinsa nitaho sa Hagonoy Police Station, nitataw nga usa ka kolor itom nga Honda XR 200, nagbaton sa plakang LE-8580 ang gitangag sa mga wa mailhing suspek.

Mga ala 1 sa hapon niadtong taknaa, bisan hayag kaayo apan wa gyud namatikdan ang mga suspek nga paspas kaayong nikagiw padong sa di pa masutang lugar bitbit ang motorsiklo.

Gumikan niini, gipahibawo na sa kapulisan ang ubang istasyon sa lalawigan aron masikop ang mga suspek, mabawi ang maong motorsiklo.

Nagpabiling suliran karon sa otoridad ang subling paggara sa mga karnaper og motor.

Bisan nihimo na og alarma ang kapulisan ngadto sa mga tag-iya'g motor nga di magpasagad og bilin niini apan aduna lamang gihapo'y mabiktima ang mga suspek.

Hangtod sa kasamtangan, wa pay si bisan usa nga nasikop ang kapulisan.

Gituohan nga usa ka organisadong grupo ang nagpaluyo niini.

Nisamot karon ang kabalaka sa ubang nanag-iya og motor sanglit wa gihapon natultulan sa kapulisan kun hain dad-on ang mga kinawat nga motor, kun nganong di kini masulbad sa ilang buhatan. Dondon Dinoy