DEAD on arrival sa balay tambalanan ang usa ka lalaki nga nakitang nagbuy-od niadtong Lunes mga alas 3:30 sa hapon sa dalan Osmeña, Cogon ning siyudad sa Cagayan de Oro.

Giila ang biktima nga mao si Mario Abog, 50, taga P-3, Gusa ning siyudad kinsa dali nga gidala sa Northern Mindanao Medical Center (NMMC) sa kapolisan.

Nasayran gikan sa personahe sa NMMC nga nakita ang biktima daplin sa dalan dihang nagpatrolya ang mga sakop sa Police Regional Mobile Group-10 libot sa Cogon ning siyudad.

Nakita nga nabuy-od ang biktima nga gituohang wala nay kinabuhi hinungdan nga gitabangan ug gidali pagdala sa NMMC apan paghidangat niini gideklarar kini sa doktor nga dead on arrival.

Gibutyag sa mga nakaila niini sa maong dapit nga kanunay nilang makita ang biktima nga magsige og inom hinungdan nga nagtuo ang mga sakop sa PRMG nga adunay sakit ang biktima ug kalit nga giatake niadtong tungora.

Walay nakita ang kapolisan nga foul play sa kamatayon sa biktima human matan-aw nga walay samad pinusilan, dinunggaban sa laing-laing parte sa lawas niini dihang gisusi.

Sa pagsulat ning balita nagpabilin pa sa morgue nga bahin sa NMMC ang patayng lawas niini.