UBOS pa sa obserbasyon sa mga doctor ang 18 anyos nga ulitawo human giingong gipusil sa polis mga alas 2:30 sa hapon niadtong Martes sa Agora, Lapasan ning siyudad sa Cagayan de Oro.

Giila ang biktima nga mao si Francisco S. Suico, ulitawo, taga Saint Jhon, Puntod ning siyudad.

Nasayran gikan sa kauban sa biktima nga igo lamang si Suico nga naglingkod gawas sa usa ka junkshop apan nakita sa usa ka polis nga nag-roving niadtong tungora.

Kalit lang nga nanita ang polis ug miingon nga “nagtambay na sad mo diri kay mangisnatch” ug deretsong mihublot og pistola dayon pusil sa biktima hinungdan sa pagkaigo sa bukton niini nga milahos sa likod, ug sa gusok nga bahin sa biktima.

Kalmado lamang kaayong milakaw ang nipusil nga polis human sa inisdente.

Ang biktima nga nagkadugo na ang daling gidala ang biktima sa Northern Mindanao Medical Center (NMMC) ning siyudad kinsa gikatakdang operahan sa mga doctor.

Ang Police Station 3 (PS3) blanko pa usab sa hitabo human wala pa sila masayod kinsay responsable sa pagpamusil sa biktima gawas pa nga wala pa usab nagpa-record ang biktima kalabot sa insidente. (SVB)