GIPANGHINGUSAN ni Top Rank CEO Bob Arum nga di pa kanselado ang November 10 fight ni 8-division world champion Manny Pacquiao.

Sukwahi kini sa unang pahayag sa Canadian adviser ni Pacquiao na si Mike Koncz nga moaway ang boxing superstar sa Disyembre 1.

Matud ni Arum, magdesisyon sila ni Pacquiao kung kinsa ang iyang kalabanon sa MGM Grand sa Las Vegas, Nevada ugmang adlawa.

Gikontra sab ni Arum ang gipangbutyag ni Koncz nga tungod sa re-election bid ni Pacman kanselado ang away niini sa Nobyembre.

Sumala sa banggiitang boxing promoter, puwede sab magpasa og kandidatura ang boksidor pinaagi sa usa ka representante nga gisaligan sa pound-for-pound king.

Ning bag-ohay lang, gipahayag ni Koncz nga sa Disyembre 1 mosaka sa boxing ring ang Pinoy boxing champion tungod sa pag-asikaso niini sa iyang kandidatura alang sa ikaduhang termino isip congressman sa Sarangani Province.

Niya pa, mamahimong busy si Pacquiao sa Oktubre ug di makabansay kung itakda sa Nobyembre 10 ang iyang away.