HUMAN natapos ang filing of certificate of candidacy (COC) niadtong Oktubre 13 ning tuig nga maoy gitagal sa Commission on Elections nagsugod na sa pangampanya ang mga kandidato ug namatikdan kini sa nagkalain-laing barangay ning siyudad sa Cagayan de Oro.

Daghan niini ang nag-inusara kay nagpapili man isip independente ug daghan sab ang nagpanon ug nagsuroy-suroy sa kadalanan dala ang nagkadaiyang mga tarheta.

Si Atty. Palmer Palamine kinsa Cagayan De Oro City Comelec officer nipahibalo nga unta mosubay sa gihatag nga instruction ang mga kandidato sama sa insakto nga pagtaod sa ilang mga poster, sakto nga kadak-on ug labina sa ginadiling pagbutang sa mga publikong lugar gawas lamang kung adunay mga pagtugot.

Apan namatikdan nga dunay mga campaign material nga bisan asa na lang gipamilit sa mga kandidato.

Nanawagan usab ang Comelec ngadto sa katawhan pagtahod sa gun ban.

Gipanawagan usab niini ang mga kandidato nga kung kinsa kadtong gustong mopetisyon o moreklamo bukas kanunay ang buhatan sa Comelec sa pagdawat niini.

Kasamtangan usab nga gi-briefing ang mga magtutudlo sa nagkadaiyang dapit ning siyudad nga maoy magsilbing Board of Election Teller (BET) sa umaabot nga eleksyon kini bisan ang ilang registration records ang gi-deactivated.

Gisugdan ang briefing niadtong adlawng Huwebes sa mga hinterland nga bahin ning siyudad.

Nasayran nga mokabat 500,000 nga mga public school teachers ang gilaumang magsilbing BET sa 36,739 ka mga voting centers sa nasod sa umaabot nga eleksyon. (SVB)