NISANG-AT og notice of strike sa National Conciliation and Mediation Board (NCMB) ang unyon sa mga trabahante sa Alta Mode Inc, usa ka garment factory sa Mactan Economic Zone human nipahibawo ang management nga manira na karong Marso 10.
Apan si Reynante Pelino, presidente sa Alta Mode Workers Union (Amwu), nagduda nga ang kalit nga pagpanira gitumong aron lang pagbungkag sa ilang unyon.
Human masang-at ang ilang notice of strike kagahapon sa buntag, plano sa Amwu nga molusad og strike vote sa 100 nila ka mga miyembro ug kon mayoriya ang mopabor sa paglusad og strike, ila gyud dayon kining ilusad.