NASIKOP sa mga operatiba sa kapulisan sa San Pedro Police Station ang usa ka lalaki kinsa gitumbok nga maoy miransak sa usa ka tindahan didto sa Bonifacio St. ning dakbayan sa Dabaw sa gihimong follow up operation niadtong Huwebes sa gabii.
Nasikpaw nila SPO3 Carlito Almazan, PO2 Castro ug PO2 Rizalito Clapuz ang suspek nga si Ricler Villasis Gultian, 31, minyo, driver ug nagpuyo sa Lizada, Toril ning siyudad didto sa kanto sa mga dalang San Pedro ug Bolton alas 8:30 sa gabii.
Nakuha sa otoridad gikan sa posisyon ni Gultian ang mga kinawat sa tindahan nga: 5 ladies necklace (bulawan), 3 ladies ring w/ diamonds (bulawan), 4 ladies white gold w/ jade stone, 4 gold pendants, 1 white gold pendant, 13 pieces black pearl (earrings), 3 pieces White pearl (earrings), 8 pieces earings w/ diamonds (gold), 8 pieces earrings w/diamonds (white gold), 4 pieces earrings w/diamonds, 1 choker w/diamond (white gold), 1 unit Nokia Cellphone model 6300, 1 unit Nokia cellphone model 1280, 1 ladies ring w/ white pearl, 1 pouch color red, ug kwartang cash nga P800 nga tag 20.
Nahitabo ang pagransak sa suspek sa tindahan nga nahimutang sa Florentine Bldg. sa dalang Bonifacio niadtong Miyerkules sa kaadlawon diin positibong nailhan ang suspek human makita siya sa closed circuit television (CCTV) ug nadakpan pinaagi
sab sa pakig-alayon sa kapulisan sa igsuon niini nga wa gihinganlan.
Sa pagkakaron, nagtingkagol na ang suspek sulod sa prisohan ug gi-andam na sa otoridad ang tukmang kaso nga ipasaka batok kaniya.
Sa pakighinabi sa SuperBalita kagahapon, gikanayon ni Gultian nga iya kining nabuhat tungod sa kalisud.
Giangkon niya nga suheto siya sa sud sa tindahan tungod kay maintenance siya kaniadto sa maong tindahan apan mihawa na tuig na ang nakalabay. (MAR)