MGA sakop sa Bansalan police nangita karon sa usa ka lalaki nga maoy gitudlong namusil didto sa Barangay Darapuay, sakop sa lungsod sa Bansalan, Davao del Sur.

Si Bernie Alcasin, hingkod ang pangedaron ug lumolupyo sa maong dapit, gipusil banda alas 9:40 sa miging gabii, sumala ni Police Officer 3 Resty Natingga.

Si Natingga nagbutyag nga gipusil si Alcasin gamit ang di pa matinong kalibre sa armas. Ang suspek nailhan nga mao si George Maghanoy, hamtong, ug nagpuyo ra sa maong lugar apan mikagiw padung sa wala matino nga dapit.

Ang biktima naigo sa iyang dughan ug gidali pagtabang ug gida sa Viacrusis Medical Clinic apan gipabalhin sa mga doktor didto sa Davao del Sur Provincial Hospital (DDSPH).

Giklaro sa kapulisan nga dili election-related violence ang nahitabo human nila masayri nga karaang bangi sa duha maoy nagtukmod sa suspek nga pusilon ang biktima.

Sa kasamtangan, gawasnon pa ang suspek human nahanaw ug apan ang kapulisan padayong nangita kaniya. (Dondon Dinoy)