COMPOSTELA PROVINCE - Usa ka bala sa .45 kalibre nga pistola ang mitapos sa kinabuhi sa lalaki nga gipusil alas 12:22 kagahapon sa udto didto sa 3K Store nga nahimutang sa Purok 1, Barangay Poblacion, lungsod sa Compostela.

Ang biktima giilang si Jovanny Carquivas, alyas Doydoy, 37, minyo, kasamtangang nagpuyo sa Purok 11, Barangay Panag sa maong lungsod.

Nasayran sa Superbalita nga samtang nangumpra ang biktima sa maong tindahan uban iyang asawa, usa ka wala mailhing tawo ang miduol dayon gipusil siya sa apapangig nga milapus sa ulo.

Gidala pa ang biktima sa St. James Hospital sa lungsod, apan gideklarang dead on arrival.

Dali sab dayong misibat ang mamumuo human sa hitabo.

Si Frededendo Carquivas, amahan sa biktima, nagsulti sa Superbalita nga wa nila damha ang kamatayon sa biktima sanglit wa kini nakaaway.

Ang biktima tulo ka bulan pa lamang nahiuli sa ilang baryo uban ang pamilya gikan sa siyudad sa Tagum diin nagtukod og bolmilan ug tindahan.

Samtang gikalap kining balita, padayon ang imbestigasyon sa kapulisan sa krimen. (Dexter Visitacion)