COMPOSTELA VALLEY -- Usa ka negusyanteng babaye ang naangol human gipusil sa wala mailhing mga lalaki samtang sakay sa motorsiklo nga gimaneho iyang kapuyo alas 2:30 sa hapon kagahapon, Huwebes.

Ang pagpamusil nahitabo sa Purok 7, Barangay Poblacion, Nabunturan.

Ang biktima mao si Luzminda Espinosa Muza, 48, nagpuyo sa Purok 3, Barangay Libasan sa maong lungsod.

Base sa report Comval Provincial Police Office, nagsakay ang biktima sa Suzuki Raider 110 motorsiklo, dunay plate number 3041 YK, nga gimaneho sa negusyanteng si Simeon Aryuja, 35.

Nasayran nga padung sila sa Barangay Poblacion apan pag-abot nila sa crime scene, usa TMX Honda nga motorsiklo nga walay plaka nga gisakyan sa duha ka tawo kalit mi-overtake kanila dayon gipusil ang biktima gamit ang wala matinong kalibre sa armas.

Naigo ang biktima sa walang ulo mao nga gidala siya sa Davao Regional Hospital.

Mga namusil daling misibat palayo sa lugar.

Sa pagsuwat ning balita, wa pa masayri ang motibo ug mga pangalan sa namusil sa biktima mao nga padayon ang imbestigasyon. (Dexter Visitacion)