PATAY ang usa ka negusyante human giluthang niadtong Domingo mga alas 2:45 sa hapon sa Iponan ning siyudad sa Cagayan de Oro.

Giila ang biktima nga mao si Eduardo Lim, taga Zone-1, Kinasanghan, Iponan ning siyudad.

Si SPO2 Ferdinand Banuag sa Police Station 7 (PS7) sa Bulua nga nahinabi sa Sun.Star Superbalita niingon nga dead on arrival sa Polymedic General Hospital si Lim human nakaangkon og duha ka mga samad pinusilan sa ulo nga bahin niini.

Nasayran nga nanag-iya si Lim sa usa ka establismento sa mineral. Paingon na nga motrabaho niadtong tungora sakay sa kaugalingong motorsiklo ang biktima.

Angkas lang si Lim sa motorsiklo dihang kalit ang gitaparan sa laing motorsiklo nga sakay ang duha ka wala mailang lalaki.

Deretso nga gipusil ang ulo ni Lim hinungdan sa pagkahulog niini gikan sa motorsiklo.

Tungod sab sa kataranta sa driver niini sa mga panghitabo wala namatikdan ang duha ka mga suspek nga dali nga misibat hinungdan nga pakyas sa pag-ila niini.

Gidali pagdala ang biktima sa maong tambalanan apan gideklararang patay na dihang gihidangat.

Blanko ang kapolisan ning panahona sa pag-ila sa suspetsado labina nga walay gikabutyag nga gikaaway sa biktima. Ang mga sakop sab sa pamilya niini nidumili pa sa paghatag og pamahayag.

Ang kapolisan nagtuo nga adunay kalambigitan ang negosyo niini sa nahitabong pagpangluthang.

Padayon pa ang gihimong imbestigasyon sa kapolisan sa PS7 uban sa taga City Intelligence Detection Unit.