USA ka operator og ball mill gipusil sa iyang kauban sab nga operator didto sa Barangay Camanlangan, lungsod sa New Bataan, Comval Province, Martes sa gabii.

Nailhan ang biktima nga mao si Jonathan Dacanay, 34, molupyo sa Purok 12, Barangay Camanlangan.

Ang gitudlong suspek mao si alyas Boyet, 45, molupyo sa siyudad sa Panabo.

Nasayran gikan sa imbestigasyon sa Comval Province Police Provincial

Office nga pasado alas 8:00 sa gabii samtang si Dacanay tua sa ball mill plant nga gipanag-iyahan sa usa ka Romeo Labiste sa Purok 10 sa maong barangay, kalit lang siyang gipasalbahan sa suspek gamit ang UZI pistol.

Sa iyang kakurat, dali nga misibat si Dacanay palayo sakay sa iyang motorsiklo, apan gisundan siya sa pagpusil ni alyas Boyet sa makadaghang higayon.

Maayo lang kay ang motor lang ang naigo ug pagpamusil ug di ang biktima.

Way nahimo si Dacanay gawas lang sa pagdangop sa kuwerpo sa kapulisan samtang ang suspek abtik nga misibat padung sa wa matino nga lugar.

Migawas sa inisyal nga imbestigasyon sa kapulisan nga daang bikil ang motibo sa pagpamusil.

Ang suspek padayong gipangita karon sa kapulisan aron nga manubag sa salaod nga iyang nahimo. (Marvin Pineda)