SA iyang labing unang personal nga pagsaksi kang pound-for-pound champion Manny Pacquiao nga nakigsangka og mas tag-as ug dagko nga sparring partners, naobserbahan ni Top Rank boss Bob Arum nga wala pa gyud gipagawas sa Pinoy boxing hero ang tanan niining makaya.

Nagkanayon si Arum basi sa iyang nakita sa pagpakig-sparring ni Pacquiao nila ni Glen Tapia ug Michael Medina nga sa iyang tan-aw, gipreserba ni Pacquiao ang iyang katakos ug nakasabot ra sab siya niini.

“At this point, you don’t wanna turn it on, because you’ve got to save it for the fight,” pasabot ni Arum sa interbyu sa www.abs-cbnnews.com.

Si Pacquiao nagpreparar alang sa iyang pagpakig-away ni Mexican Antonio Margarito karong Nobiyembre 13 sa Dallas Cowboys Stadium.

Nagkanayon si Arum nga ang dakong gintang sa gitas-on ug gidak-on maghatag gyud og problema kang Pacquiao.

“That’s gonna be a problem fighting a tall guy like Margarito because he has to punch up, so that’s not gonna be easy,” batbat ni Arum.

Apan lahi ang pagtuo sa sparring partners ni Pacquiao.

“It’s not gonna bother him. He’s good. It’s natural for him,” asoy ni Tapia.

“The skill of Manny is going to break that [height] advantage,” asoy sab ni Medina.