ANG hepe sa Land Transportation Office (LTO) kagahapon niingon nga ang tanang mga sakyanan kinahanglan butangan og Radio Frequency Identification (RFID) tag kay kon di, di ma-renew ang ilang registration.
Si Assistant Secretary Arturo Lomibao, LTO chief, niingon nga ang RFID tag rekisito gyud sukad niadtong Nobiyembre 3, 2009.
Sugod sa Enero 4, 2010, wa nay sakyanan nga irehistro alang sa renewal registration deadline nga way RFID tag nga gimando sa LTO ug Department of Trans-portation and Communication (DOTC).
Si Lomibao niingon nga kada motorista kinahanglang mobayad og P350 matag sakyanan.
Ubos sa normal nga operating conditions ug paggamit, ang RFID molungtad hangtod sa 10 ka mga tuig.
Si Lomibao nianhi sa Sugbo kagahapon ug nisusi sa tanang LTO vehicle registration aron pagsuta kon ang RFID gipatuman na ba.
Si Lomibao niingon nga ang RFID magwagtang sa kolurom nga mga sakyanan, dali nga masubay ang gikarnap nga mga sakyaan ug mailhan ang public utility vehicles nga nag-operate gawas sa ilang linya.
Si LTO 7 Assistant Regional Director Edgar Catarongan niingon nga sugod sa Marso 2010, magsugod sila sa pagpanakop ug pag-impound sa mga sakyanan nga ang rehistrasyon kinahanglang I-renew sa Enero ug Pebrero apan way RFID tag.
Siya nidugang nga ang pugsanay nga RFID tag ipahigayon sa rehistrasyon gikan sa Enero ngadto sa Oktubre 31, 2010. (EOB sa Sun.Star Cebu)