WALAY nakitang foul play ang kapulisan sa Island Garden City of Samal Police Station pagkalumos sa usa ka Indian national kagahapong adlawa.

Kini ang nasayran sa Superbalita gikan kang Police Superintendent Glenn Cristines, PIO sa Davao del Norte Provincial Police Office, kinsa miila sa namatay nga si Vijay Baskar Paneer Seluam, 27, lumad nga taga India ug kasamtangang nagpuyo sa Do¤a Vicente Heights, Bajada, dakbayan sa Davao.

Nasayran nga si Seluam uban sa iyang mga barkada, sumala pa, nagbuntag og inom niadtong Lunes pa sa gabii ug puwerteng hubuga na sa dihang naligo sa dagat alas 5:30 sa kaadlawon sa pagka-adlawng Martes.

Nakurat na lang ang mga kauban ni Seluam sa compound sa Isla Reta Resort, Barangay Sta. Cruz, Kaputian District, Igacos, sa dihang ilang nakita siyang wala na nagginhawa ug naglutaw-lutaw na sa tubig.

Gidali pagdala sa mga kauban ang biktima ngadto sa Davao Medical School Foundation Hospital (DMSFH), apan igo lang nga mipasamot sa kaguol sa mga higala sa biktima kay gideklarang dead on arrival si Seluam sa miatiman nga doktor.

Nasayran nga si Seluam usa ka tinun-an sa DMSF.

Si Police Chief Inspector Marlon Pinote, hepe sa IGACOS Police Station, nagpasalig nga makig-istorya sa mga tag-iya og resort ug mohimo og mga lakang aron di na masubli pa ang maong insidente. (Teddy Cabana)