WALAY nabiktima sa pabuto sa dakbayan sa Panabo atol sa pagsugat sa Bag-ong Tuig.

Sumala ni Police Senior Inspector Florentino Delima, Deputy Chief of Police sa Panabo City Police Station nga 'zero firecracker incident' ang siyudad sa pagsugat sa tuig 2010.

"Negative firecracker incident ang Panabo sa Bag-ong Tuig," sigun sa pamahayag ni Delima sa iyang gipadala nga text message sa Superbalita.

Ang dakbayan sa Panabo nagpatuman sa balaod nga pagdili sa pagpamaligya, pagpabuto sa bisan unsa mang matang sa pabuto atol sa Pasko ug Bag-ong Tuig.

Nagtuo ang mga otoridad nga ang nahisgutang balaud sa siyudad sa Panabo nakatabang og dako aron way madisgrasya sa mga pabuto.

Niadtong Pasko, wa sa'y gitahong nasamdam o nabuthan og mga pabuto sa siyudad.

Samtang sa Davao Regional Hospital sa dakbayan sa Tagum, upat ka mga tawo ang nadala human nabuthan og rebentador.

Duha sa mga biktima mga menor de edad nga taga-lungsod sa New Corella, Davao del Norte ug ang usa taga-lungsod sa Pantukan, Comval Province.

Ang laing duha ka mga biktima pulos taga-siyudad sa Tagum, usa ka taga Barangay Apokon ug usa taga Barangay Visayan Village.

Gisulti ni Dra. Amina Rasul sa Davao Regional Hospital nga ang upat ka mga biktima nakahiagum og mga samad ug paso sa kalawasan human nabuthan.

Hinuon ang mga biktima luwas na sa makuyaw nga kahimtang.

Sa dakbayan sa Tagum, wa gidili sa lokal nga kagamhanan ang pagpabuto og mga firecrackers.

Apan limitado lamang sa mga dili delikadong pabuto ang gitugot sa siyudad. (Marvin Pineda)