HAYAN mag-atubang og kasong administratiba ang hepe sa Fuente Police Station nga si Chief Insp. Michael Anthony Bastes human giingong niisyug mission order sa usa ka civilian, kinsa nasikop nga nagdalag armas.

Si PRO-7 Deputy Regional Director for Administration Senior Supt. Silvestre Primero nibutyag nga niadtong miaging semana, si Senior Supt. Josephus Angan, chief of staff sa PRO-7, nakasikop og usa ka civilian atubangan sa PRO-7 nga giingong naghupot og armas.

Sa imbestigasyon nasayran nga ang maong dinakpan gihimong bodyguard sa usa ka civilian hinungdan nga gidakop tungod sa paghupot og armas.

Apan nasayran nga usa diay kini ka civilian ug sa dihang gipangutana kon duna bay lisensya ang iyang armas, igo lang kining nipakita sa mission order diin ang niisyu ug nipirma mao si Bastes.

Gipasabot ni Primero nga wa kini gitugot bisan kinsa kanilang mga pulis nga mo-isyug mission order.

Samtang nisamot ang problema tungod kay natumong pa gyod nga gipatuman ang Commission on Elections (Comelec) gun ban.

Matod ni Primero nga iya nang gimandoan ang mga imbestigador sa PRO-7 sa pag-imbestigar kang Bastes.

Wa isalikway ni Primero nga mag-atubang og kasong administratiba si Bastes labot sa iyang pag-isyug mission order.

Hinuon sa iyang bahin, si Bastes niingon nga andam niyang atubangon ang imbestigasyon apan niklaro nga wa siya moisyo og armas.

Hinuon aduna siyay gihatagan og mission order sa dihang siya pay hepe sa Theft and Robbery Section (TRS) kaniadto aron makatabang kanila paggukod sa mga kriminal.