GIKAN sa pagka-operatiba sa Carmen Police Station nagdupa-dupa na sa dalan isip tigpahapsay sa dagan sa trapiko ang usa ka polis human natulog daplin sa dalan ug nagtakin pa sa iyang armas.

Kini ang gimando ni Senior Superintendent Benedicto Lopez, hepe sa Cagayan de Oro City Police Office (Cocpo) isip immediate sanction ngadto kang Police Officer 3 Carlo Maglangit.

Gikuha usab ang iyang service pistol nga kalibre .45 samtang padayon ang imbestigasyon sa iyang binuhatan.

"Pinatupad pa rin natin ang due process para mapakinggan ang kanyang side pero hindi rin maganda ang ginawa niya at nakakahiya sa public," pamahayag ni Lopez ngadto sa Sun.Star Cagayan de Oro.

Si Maglangit nakit-an nga natulog daplin sa dalan Velez ning siyudad mga alas 7:30 sa buntag sa niaging adlaw nga nakapa-alarma sa mga tawo labina nga duna kini armas ug nakasibilyan pa niadtong higayona.

Dali nga niresponde ang kapolisan sa Police Station 1 human nakadawat og taho ug gidala sa ilang buhatan diin nasayran nga nakainom si Maglangit nianang gabii.

Hinuon gipasabot ni Maglangit ngadto kang Chief Inspector Lemuel Gonda, station commander sa Police Station 1 nga dili siya hubog apan samtang siya nagmaneho sa motorsiklo kalit naglain ang iyang lawas hinungdan nga nihunong aron mopahuway ug nakatulog. (Annabelle L. Ricalde)