GIKAHADLOKAN sa pipila ka mga mamalitay ang giingong pagbutang og formalin sa mga mamaligyaay sa mga utananon sa bisan mga merkado ning siyudad sa Cagayan de Oro.

Usa ka mamalitay nakuyawan sa migawas nga taho nga giingong gibutangan og formalin ang mga utanon nga ibaligya aron kini mapreserbar ug daw dugay kini nga madaot.

"Kakuyaw ba sad anang formalin kung tinuod man nga gibutangan ang mga utanon nga para raman unta na sa patay," ni Jonalyn nga nahinabi sa Sun.Star Superbalita uban sa kabalaka labina nga suki na sa pagbalik-balik sa bisan asang merkado.

Apan pipila ka mga mamaligyaay nihimakak niini ug miingon nga ang seguridad sa panglawas sa ilang mamalitay ang ilang gilantaw ug walay kamatuoran ang nigawas nga taho kalabot sa giiingong gibutang nga formalin.

Subay niini, gimando ni Mayor Vicente Emano sa mga hingtungdan ahensya nga sutaon kung unsa ka tinuod ang migawas nga taho kalabot niini ug gisigurong walay formalin ang mga utanon human nakitang delikado kini sa panglawas sa usa ka tawo. Ang masapon ug masutang mamaligyaay nga nibutang niini pahamtangan og silot.

Kahinumduman nga ang formalin usa ka aqueous solution o chemical compound sa formaldehyde. Kini tipikal adunay 40 porsiyento sa formaldehyde by volume, ug small amount sa stabilizer ug kasagaran adunay 10 porsiyento ngadto 12 porsiyento methanol. (Stephanie V. Berganio)