NAHUKMAN sa Cebu Schools Athletic Foundation Inc. (Cesafi) nga tangtangon ang slamdunk contest isip usa sa mga side events sa All-Star Games nga ipahigayon ugma sa Cebu Coliseum.
Kini gumikan kay nakita sa liga nga wala na’y balanseng kompetisyon ug wala gyu’y makasukol kang slamdunk champion Elwin Durano sa University of Southern Philippines - Foundation (USPF) Panthers sa linayatay.
Gipuli sa slamdunk contest mao ang horse trick game diin magsinundugay ang mga partisipante sa bisan unsa estilo nga pag-itsa.
Sa laing bahin, kombatihon gihapon ang three-point shootout diin magsangka ang mga tirador sa liga.
Ang mga partisipante niini mao sila si Elmer Mykiel Cabahug ug Eman Calo sa 9-time champion University of the Visayas (UV) Green Lancers, Kelvin Juliane ug Robinson Mohammad sa University of Cebu (UC) Webmasters, Mike Cantonao ug Jovannie Padillo sa University of San Carlos (USC) Warriors, Chris Litorja ug Gil Wagas SWU Cobras.
Naa sab sila si Karenrick dela Cerna ug Allen Dimco sa Cebu Institute of Technology (CIT) Wildcats, Jemar Dela Peña ug Jasyon Nudalo sa University of San Jose Recoletos (USJ-R) Jaguars, Jonpons Geraga ug Clarito Hernando sa Don Bosco Technological Center (DBTC) Greywolves ug Ellison Rivera ug Randy Avila sa USPF Panthers.
Ang three-point shootout ug horse trick game ipahigayon tungatunga sa West vs. East All-Star Games sa high school ug college divisions.